يا وردتي

يا من عطّرت الندى بشذا الفجر
وندّيت أوراق الخريف...من مطلعك
أقبلت تتهادى على أمواج البحر
تكتب شعر في خطوتك
تنثر زهر بكلمتك
تجمع لي خيوط الأنين
تغزلها مع لحني الحزين
تعزف من إشجاني الفرح بنغمتك
تتراقص أشواقي على دروب الأمل

لملم ...دموعي بيديك
واعجنها بأشواقي إليك
وحنّي الأيادي بفرح
ووسمها بكفوف(ن) تصافح شوقها
و دايم تقول
ما أحلا الهروب منك إليك

يا وردتي
يللي صبغ بياضها كل القلوب
وتعطِّر بريح عطرها كل الدروب

ليه الصباح أصبح ظلام
وما عاد في ليلنا بدر
ليه البحر دايم ثبر
و أمواجه ما تلامس اليال
ليه العطايا مبعثرة يمنه وشمال ... و نشكي الفقر
ليه النفوس مترددة ما بين ... مد وجزر

ليه الحروف ضاعت ... من وسط الكلام
ليه الورود تذبل وسط عز الربيع
ليه الشتا عاف الدفا
والقيض عيا ينتشي بموج البحر

ليه الربيع يغار من وقت الخريف
ويعاتب كل من يرسمه
ويعاف حتى موسمه

ليه العيون متلبدة بديمة دموع
ليه الشموع
عيت بعد لا تشتعل ...
وتضوّي وحشة النفوس ... بنور الأمل

ليه الأمل أصبح بعيد
يتلاشى والشوق له يزيد

ليه الدروب متعرجة
حتى الحكايا الدارجة ... والحاني وأنواع القصيد
ليه انقطع منها الرجا

ليه الحبيب أصبح وحيد
ليه العتب أمسى وعيد
ليه القلوب الحانية ما عاد تحن
ليه الزمن هاجر ثوانيه ونسى
ليه الثواني عابسة
ليه الأماني حابسة حروف الألم
ليه يا عيوني ناعسة ودوم لابسه ...ثوب العزا
ومتوجسة

ليه أنا من بد البشر عايش غريب
بلا وطن

ليه السؤال أصبح خطيئة
والجواب عنه فِتَنْ

مجروح يا جرحي وتزيد
كل يوم لي جرح جديد
عدوني في حبك ... شهيد
وبالنسبة لي ... أنت وطن